சில புதிய கவிதைகள்

இப்படி உணர்ந்ததுண்டா?

பழைய ஒருத்தி இறந்துவிட்டாள்
வேறொருத்தி தோன்றிவிட்டாள்
மடிந்து மறைந்த தாழம்பூ
மல்லிகையாகிவிட்டது
வலி தந்த அம்பைப்
பிய்த்தெறிந்தாகிவிட்டது
ஒரு தழும்பு அனாதிகாலத்தின்
கவர்ச்சியோடு
வெற்றுடலில் மினுங்குகிறது
புன்னகைக்கிறாள்
குளித்துமுடித்தவுடன்
கட்டாத முடி முகத்தில் அலையும்
புதிய காட்டின் புன்னகை
ஆம், காதல் இன்னும்
மூச்சுவிடுவதை நிறுத்தவில்லை
மல்லிகைக்குள் புழு ஊர்கிறது
ஒருத்தியிலிருந்து
இன்னொருத்தி பிறக்கும்போது
ஒருவனிடமிருந்து இன்னொருவனும்
பிறக்கத்தான் செய்கிறான்
விதிக்கப்பட்ட விதியிலிருந்து
இன்னொரு விதி பிறக்கிறது
உன்னை மட்டுமே
விடாமல் துரத்தும் அதனிடமிருந்து
தப்பிக்கவேண்டுமானால்
நீ செவ்வாய்க்கிரகத்தில்
பிறந்திருக்க வேண்டும்

Courtesy: Metmuseum. org

இன்று கேள்விப்பட்டேன்

ஒரு முப்பது வயதுப்பெண்
தன்னுடைய இரண்டு காதலர்களோடு
கணவனைக் கட்டையால்
அடித்துக் கொன்றதை

பெரும்பாலும்
காதலுக்கு முதல் எதிரி கணவன்தான்
இரண்டு காதல்கள் என்கிறபோது
இரண்டு எதிரிகளாகிவிடுகிறான்
கழுத்தில் தாலி இருந்தால் கணவனுக்கு
நீண்ட ஆயுள் என்கிறார்கள்
இதைக் கேட்டு வளர்ந்தவள்
கட்டையைக் கையிலிடுக்கும்முன்
தாலியைக் கழற்றி வைத்திருப்பாள்

எப்படியோ தப்பித்துவிட்டான்
அவனுக்கு சொர்க்கம் தரப்பட வேண்டும்
அவன் செத்த இடத்துக்கு வந்து
இளம்பெண்களைப் பிடிக்காதிருக்க வேண்டும்
அவனுக்குத் திதி தருவாள் இவள் என
எதிர்பார்க்காமல் இருக்க வேண்டும்

சாவுத் தருணங்களுக்குப் பிறகான சாவு
வாழ்வைப் போல் இல்லாவிட்டாலும்
சாவைப் போலிருக்காது

தமிழ் எழுத்தாளராக இருந்தால்

நான் ஏற்கும் விருதுகளோ
அடையும் அவமானங்களோ  இருக்கட்டும்
ஒரு துப்பாக்கியை
என் தலையின் இடப்புறம்
மிகச் சரியாக வைத்து
அதன் விசையை அழுத்தும்போது
தெறித்துவிழும்
துண்டு துணுக்குகளில்
நீங்கள் தேடித் தேடிக் கண்டு
ஆர்ப்பரிக்கப்போவது
எந்தச் சாதியை
எந்தப் பாலினத்தை
எனக்கு நன்றாகவே தெரியும்
ஒரு பட்டாம்பூச்சியின்
கத்தரித்த சிறகுகளை
கையில் வைத்துக்கொண்டு
அது எப்படிப் பறந்ததென
பார்க்க முயல்பவர்கள் அல்லவா நீங்கள்?

குடித்துவிட்டு டைப்ரைட்டர்முன் அமர்ந்திருப்பது
பார்த்த, கேள்விப்பட்ட, தெரிந்த
எந்தப் பெண்ணோடும் இருப்பதைவிட சாலச் சிறந்தது என்கிறான் ஹேங்க்

எனக்குக் குடித்துவிட்டெல்லாம் அமரவேண்டியதில்லை
ஒரு பாட்டில் ஒயின் என் முன்னே
அமர்ந்திருப்பதே போதும்
கெட்டுப்போன உறவுகளை
சந்திக்க இயலாத காலக்கெடுகளை
உள்ளும் புறமும் பரவும் தீயை
அது மறக்கச் செய்கிறது
மேலும் மறதிக்குப்
பூட்டுப்போட்டுப் பாதுகாக்கிறது
கடவுளாகவே பாட்டில்
காட்சி தருகிறது மேஜை மேல்
தன் இல்லாத ஆயிரம் கண்களால்
விழித்துப் பார்த்தபடி
காலங்காலமாக
நானாவிதத் துயரங்களுக்குமான
ஒரே திரவ பதில்
உடனடியாக ரத்தத்தில் கலந்துவிடும் கடவுள்
எஸ்.டி.டி அபாயமில்லை
அது கூடுதல் ஆறுதல்